B’í Siobhán Uí Cheallaigh a chum na focail don charúl álainn seo agus b’é Peadar Ó Riada a chóirigh agus a chuir ceol leis.
Foinse: Peadar Ó Riada
A Phrionsa bhig sa tuí, i mainséar fuar id’ luí,
Is saighead trém’ chroí bheith ag smaoineamh ar do chéad-theacht,
Gan fáil ar íostas oíche agat, Muire is Iósaf tuirseach spíonta,
Réalta seaca agat mar dhíon is sneachta séidte.
Ach tháinig asal, bó is caora is bhuail tocht bróin a gcróithe,
Agus sheasadar, id’ thímpeall go ciúin maordha,
Gur shéid anál go cruínn ort, is le teas a gcoirp thug dídean duit,
Is tháinig luisne ar do ghnaoi is tú seascair téite.
Cúrfa
Buailimís cloig go bríomhar is seinnimís ceol bínn duit,
Céad fáilte rómhat, a Naíon dhil.
Ar an gcnoc bhí na h-Aodhairí nuair a chualadar ceol draíochta,
Tháinig glórtha diaga Aingeal ins na spéartha,
Agus chanadar le bínn-ghuth “Glóir do Dhia go siorraí,
Is ar thalamh i measc na gciníocha, go buan go raibh siocháin”.
Éist, a Linbh Íosa le guí na n-aingeal an oíche úd,
Tabhair tuiscint dod’ chréatuirí ar a chéile,
Go gcuifear stop le calaois, le mí-dhaonnacht is sclábhaíocht,
A Phrionsa Bhig sa tuí, tabhair dúinn faoiseamh is síocháin.
Cúrfá
Focail Siobhán Bn Uí Cheallaigh Ceol is cóiriú Peadar Ó Riada.
Múscraí 